22 кастрычніка ў Сяляўшчынскай сельскай бібліятэцы да 100-годдзя з дня нараджэння дзіцячага паэта Івана Муравейкі бібліятэкар правяла для дзяцей 2 класса Сяляўшчынскай дзіцячы сад-базавай школы літаратурнае падарожжа па творах аўтара.

У пачатку мерапрыемства дзеці пазнаёміліся з біяграфіяй І. Муравейкі, які нарадзіўся ў Мінскай вобласці, скончыў Любанскую сярэднюю школу і паступіў у Мінскі камуністычны інстытут журналістыкі. У Вялікую Айчынную вайну І. Муравейка ваяваў, удзельнічаў у штурме Берліна, на сцяне рэйхстага пакінуў надпіс: «Іван з Беларусі». Усе свае пасляваенныя гады ён пражыў у Любані, на Міншчыне, працаваў у рэдакцыі раённай газеты і займаўся літаратурнай творчасцю.

Потым дзеці адправіліся ў падарожжа: на першым прыпынку “Школьны званок” чыталі вершы пра школу: “Як Васіль вучыў урок”,  “Пра мышку і кніжку”, “Шчаслівы чалавек”. Наступны прыпынак: “Не папрацуеш – не пад’ясі” быў прысвечаны вершам пра працу і хлеб. Правялі гульню “Як дапамагаеш маме – пакажы”. На трэццім прыпынку размова ішла пра буслянку па творы І. Муравейкі “Мая бусліная сям’я”. Вельмі спадабаўся навучэнцам і прыпынак “Артыстычны”, дзе трэба было зрабіць інсцыніроўку па творы аўтара-юбіляра, ці  выразна прачытаць верш.

Напрыканцы мерапрыемства дзеці адказалі на ўсе пытанні віктарыны “Што я знаю пра Івана Муравейку”.