21 лютага да Міжнароднага дня роднай мовы ў чытальнай зале раённай бібліятэкі прайшла гадзіна беларускай мовы “Зямлі маёй роднае слова”. Вядучыя мерапрыемства распавялі прысутным, што дзеля захавання моў, якія апынуліся на парозе знікнення, міжнародны фонд ЮНЕСКА абвясціў у 1999 годзе дзень роднай мовы, бо родная мова – бясцэнны скарб, якім мы павінны ганарыцца і які павінны шанаваць.
Вядучыя загадвалі ўдзельнікам беларускія “Загадкі-жарты”, цікавыя заданні ў гульне “Пытанне – адказ” і паўтарылі запаведзі аб мове В.Шведа. Адчуць прыгажосць і хараство роднай мовы прысутным дапамагло чытанне вершаў класікаў беларускай літаратуры Н.Гілевіча – “Я беларус”, Ю.Свіркі – “У нас сваіх хапае слоў”, А.Пысіна – “Дала мне маці мову гэту”. Паўдзельнічаць ў мерапрыемстве і пачытаць свае прыгожыя беларускамоўныя вершы завіталі ўдзельнікі народнага клуба самадзейных паэтаў “Натхненне”. Завершылася сустрэча словамі З.Бядулі: “Не саромся, беларус, гаманіць па-свойму — на роднай мове бацькоў і дзядоў сваіх. Шануй сваю мову, шануй свае песні, свае казкі, звычаі і ўсё роднае — гэта спадчына дзядоў і вялікі нацыянальны скарб. Толькі тады цябе ўсе будуць шанаваць як чалавека, калі сам сябе будзеш шанаваць — калі не адкінеш свайго нацыянальнага ўласнага багацця. А першы скарб нацыянальны — гэта родная мова”.
Да Міжнароднага дня роднай мовы ў бібліятэцы была падрыхтавана кніжная выстава “Роднаму слову – гучаць!”, на якой ўсе жадаючыя могуць пазнаёміцца з творчасцю беларускіх пісьменнікаў, як класікаў , так і сучасных аўтараў, з беларускамоўнымі часопісамі і газетамі.
