23 лютага да Міжнароднага дня роднай мовы ў Сяляўшчынскай сельскай бібліятэцы была праведзена літаратурная гульня “Знаўцы роднай мовы”.
У мерапрыемстве прынялі ўдзел вучні пачатковых класаў ДУА “Селяўшчынскі дзіцячы сад – базавая школа Расонскага раёна”. Бібліятэкар распавяла вучням, што ў календары ёсць такое свята – Міжнародны дзень роднай мовы, які адзначаецца штогод 21 лютага. Мы – беларусы, таму павінны шанаваць, любіць і ведаць родную мову – беларускую, бо народ без яе не можа мець нацыянальнай годнасці. Падчас мерапрыемства дзеці з задавальненнем прынялі ўдзел у цікавых гульнях, што падрыхтавала бібліятэкар. У гульне “Перакладчык” перакладалі словы і выразы з рускай на беларускую мову, ў гульне “Раскажы казку” адгадвалі казку, а за тым расказвалі, чым яна закончылася, ў гульне “Заблытунчык” знаходзілі, што ў вершы пераблыталася.
Падчас мерапрыемства вучні адгадвалі загадкі-жарты на беларускай мове, выконвалі заданне “Збярыце прыказкі”. Для таго каб правільна выконваць заданні і адказваць на пытанні, дзецям спатрэбілася дапамога і яны звярталіся да кніг з кніжнай выставы В. Кажура “Патрэбныя рэчы заўсёды дарэчы”, У. Мацвеенка “Старонкі з моўнай скарбонкі” і да кніг серыі “100 беларускіх назваў”. Напрыканцы мерапрыемства дзеці праслухалі вершы У. Дубоўкі, П. Броўкі і А. Дзеружынскага пра родную мову.
