21 лютага ў Сяляўшчынскай сельскай бібліятэцы да Міжнароднага дня роднай мовы для навучэнцаў 4 класа ДУА ”Сяляўшчынскай базавай школы Расонскага раёна“ прайшла літаратурная віктарына ”Гучы, родная мова!“.

Бібліятэкар расказала аб важным значэнні роднай мовы ў жыцці кожнага чалавека. Нам у спадчыну засталася мова продкаў-беларусаў – жывая і мілагучная, песенная і паэтычная, старажытная і сучасная, таму трэба берагчы яе, вывучаць і карыстацца ёю штодня. Дзякуючы беларускім пісьменнікам наша мова жыве і развіваецца. А якія словы яны знаходзяць, каб выказаць сваю любоў да роднага слова!

Удзельнікі мерапрыемства прачыталі вершы Генадзя Бураўкіна, Пімена Панчанкі, Авяр’яна Дзеружынскага. Яны прынялі ўдзел у этапах віктарыны: ”Назаві адным словам“, ”Складзі прыказку“, ”Пагуляем у рыфму“, ”Скорагаворкі“, ”Наадварот“, ”Метаграмы“, а таксама склалі сінквейн на тэму ”Мова“. У дапамогу дзецям была арганізавана выстава “Знаўцы беларускай мовы”.