9 лістапада ў чытальнай зале раённай бібліятэкі адбылося пасяджэнне літаратурнага клуба “Винтаж” – “Як песня народа – неўміручы наш Колас!”. Вядучыя мерапрыемства распавялі аб тым, што 3 лістапада (па новым стылі) споўнілася 139-гадоў з дня нараджэння вялікага паэта, празаіка, драматурга, перакладчыка, выдатнага лінгвіста і фалькларыста, Народнага паэта Беларусі – Якуба Коласа. Заслуга Якуба Коласа як нацыянальнага пісьменніка ў тым, што ён адкрыў для развітых літаратур свету беларускае пісьмовае слова,  заклаў асновы беларускага рамана. Падрыхтаваная з гэтай нагоды электронная прэзентацыя, “Як песня народа – неўміручы наш Колас!”, дапаўняла словы вядучых.

Падчас мерапрыемства ў выкананні ўдзельнікаў клуба гучалі вершы: “Родныя вобразы”, “Восень”, “ У палях Беларусі” , “На полі вясною”, “Зорка”; апавяданні “Хвароба” і “Кучаравае дрэва” са зборніка “Казкі жыцця”; урыўкі з паэм Якуба  Коласа “Новая зямля” і “Сымон-музыка”.

Да 139-годдзя з Дня нараджэння Народнага паэта Беларусі Якуба Коласа ў раённай бібліятэке было аформлена літаратурнае акно, а ў чытальнай зале ўвазе чытачоў была прадстаўлена  кніжная выстава  “Як песня народа – неўміручы наш Колас!”. На выставе – шматгранная спадчына славутага мастака слова: зборы твораў, выбраныя творы, матэрыялы аб жыцці і творчасці.