Чым акрэсліць любоў да радзімы малой?
Пакланюся бярозцы ды гаю.
У сасновым бары прывітаю імхі…
Гэта сціпла зусім – гэта знаю,
Толькі сціпласць душы не імкнецца ў грахі,
Я за гэта падзяку ёй маю.

Чым акрэсліць любоў да радзімы малой?
Быць удзячным вясковаму люду
За гасціннасць і шчырасць сустрэчы штораз,
Што заўсёды я згадваць буду.
Гэту з памяці ўдзячнаць не выкрэсліць час.
Дзе б ні быў, я яе не забуду.

Чым акрэлсіць любоў да радзімы малой?
Трэба помніць драўляны свой ганак,
Па-над звілістай рэчкай на строме сасну
І маленствам асветлены ранак,
Дзе ў расінцы таемны праменьчык бліснуў,
І расквеціў дарослы світанак…

Чым акрэсліць любоў да радзімы?
Карані трэба помніць свае.
Гэту памяць праз вёсны і зімы
Зберагаць у пяшчоце яе.

А. Матошка