“Шляхціц Завальня. Сувязь часоў”
- Подробности
- Опубликовано: 23.07.2019 16:34
Яна Баршчэўскага нездарма называюць адным з самых першых сярод пачынальнікаў новай беларускай літаратуры. Вядома, што свой творчы шлях ён пачаў вершамі на роднай мове ў 1809 годзе. Але розныя абставіны не дазвалялі маладому аўтару друкаваць іх ды і беларускага друку тады не існавала. Таму будучы паэт і пісьменнік, наш знакаміты зямляк, вымушаны быў перайсці на польскую мову, якая ў той час з’яўлялася літаратурнай мовай Беларусі. Так ужо наканаваў яму лёс: усё жыццё Баршчэўскі пісаў на польскай мове, размаўляў на рускай, вось толькі думаць і марыць мог на мове бацькоў і тых людзей, што жылі каля шырокага і глыбокага возера Нешчарда.
